| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 58.39 | Dem. 58.42 (English) | >>Dem. 58.45 |
58.41ὅλως δʼ ἔγωγε οἶμαι δεῖν ὑμᾶς , ὦ ἄνδρες δικασταί , ὑπὲρ αὐτοῦ τοῦ πράγματος σκεψαμένους , εἰ μὲν δίκαια λέγω καὶ κατὰ τοὺς νόμους , βοηθεῖν μοι , μηδὲν ὑπολογισαμένους εἰ μὴ Δημοσθένης ἐστὶν ὁ κατηγορῶν , ἀλλὰ μειράκιον , μηδὲ νομίζειν κυριωτέρους δεῖν εἶναι τοὺς νόμους , ἂν εὖ τις τοῖς ὀνόμασι συμπλέξας αὐτοὺς τούτους ὑμῖν παράσχηται , τῶν ὅπως ἔτυχεν λεγόντων , ἀλλὰ τοὺς αὐτούς , καὶ τοσούτῳ μᾶλλον τοῖς ἀπείροις καὶ τοῖς νέοις βοηθεῖν , ὅσῳπερ ἂν ἧττον ἐξαπατήσειαν ὑμᾶς .
58.42ἐπεὶ διότι τοὐναντίον ἐστίν , καὶ οὐχ οὗτος , ἀλλʼ ἐγὼ κατεστασίασμαι , καὶ φησάντων τινῶν μοι συναγωνιεῖσθαι προδέδομαι διὰ τὰς τούτων ἑταιρείας , ἐκείνως δῆλον ὑμῖν ἔσται . καλείτω ὁ κῆρυξ οὗτος τὸν Δημοσθένην · οὐκ ἀναβήσεται . τὸ δʼ αἴτιόν ἐστιν , οὐ τὸ ἐμὲ ὑπό τινων πεπεισμένον ἐνδεῖξαι τουτονί , ἀλλὰ τοῦτον καὶ τὸν ἄρτι καλούμενον διαλελύσθαι . καὶ τοῦθʼ ὅτι ἐστὶν ἀληθές , ἀναγκάσω μὲν μαρτυρεῖν καὶ Κλεινόμαχον τὸν συναγαγόντʼ αὐτοὺς καὶ Εὐβουλίδην τὸν ἐν Κυνοσάργει παραγενόμενον ·
58.43οὐ μὴν ἔλαττόν γε τούτου σημεῖον ὑμῖν , ἀλλὰ μεῖζον παρασχήσομαι διότι τοῦτʼ ἔστιν ἀληθές , ὃ πάντες ἀκούσαντες ὁμολογήσετε . Θεοκρίνης γὰρ οὑτοσὶ τοῦτον διώκων παρανόμων , τὸν μιαρόν , ὡς αὐτίκα φήσει , καὶ τῶν νῦν αὐτῷ κακῶν αἴτιον , φανερῶς ἀφῆκε τῆς γραφῆς , ἐφʼ ᾗ δέκα τάλαντα ἐπεγράψατο τίμημα . πῶς ; οὐδὲν καινὸν διαπραξάμενος , ἀλλʼ ὅπερ ἕτεροί τινες τῶν ὁμοίων τούτῳ . τὸν μὲν Δημοσθένην τις ὑπωμόσατο καλουμένης τῆς γραφῆς ὡς νοσοῦντα , τὸν περιιόντα καὶ λοιδορούμενον Αἰσχίνῃ · τοῦτον δʼ οὗτος τὸν ἐχθρὸν εἴασεν , καὶ οὔτε τότε ἀνθυπωμόσατο οὔθʼ ὕστερον ἐπήγγελκεν . ἆρʼ οὐ περιφανῶς οὗτοι φενακίζουσιν ὑμᾶς τοὺς προσέχοντας τούτοις ὡς ἐχθροῖς ; λέγε τὰς μαρτυρίας .
Μαρτυρίαι
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 58.39 | Dem. 58.42 (English) | >>Dem. 58.45 |
